وینس فلم فیسٹیول کا آغاز، جارج کلونی کو لائف ٹائم اچیومنٹ ایوارڈ دیا جائے گا

وینس: دنیا کے قدیم ترین فلمی میلوں میں شمار ہونے والے وینس فلم فیسٹیول کا آغاز اٹلی کے شہر وینس میں ہوگیا، جہاں ہالی ووڈ اداکار جارج کلونی کو ان کی طویل فلمی خدمات کے اعتراف میں لائف ٹائم اچیومنٹ ایوارڈ سے نوازا جائے گا۔

65 سالہ جارج کلونی وینس فلم فیسٹیول کے ریڈ کارپٹ پر کئی مرتبہ جلوہ گر ہوچکے ہیں۔ رواں برس بڑے ہالی ووڈ اسٹوڈیوز کی محدود شرکت کے باوجود ان کی موجودگی نے فیسٹیول کی افتتاحی تقریب کی اہمیت بڑھا دی ہے۔

افتتاحی تقریب سے قبل صحافیوں سے گفتگو کرتے ہوئے جارج کلونی نے وینس فلم فیسٹیول سے اپنی دیرینہ وابستگی کا اظہار کیا۔ انہوں نے کہا کہ فلمی کیریئر میں کامیابی کے لیے محنت کے ساتھ قسمت کا بھی اہم کردار ہوتا ہے۔

12 ستمبر تک جاری رہنے والے فیسٹیول میں اس سال بڑے کمرشل بلاک بسٹرز کی تعداد کم ہے، تاہم معروف شخصیات اور اہم موضوعات پر مبنی فلمیں توجہ کا مرکز ہیں۔ فیسٹیول میں ایلون مسک، روپرٹ مرڈوک اور برطانوی میوزک بینڈ اویسس کے بھائیوں لیام اور نول گالاگر کے بارے میں بنائی گئی فلمیں بھی شامل ہیں۔

مرکزی مقابلے میں واحد دستاویزی فلم ’’نازا‘‘ ہے، جو غزہ میں شہریوں کی ہلاکتوں کے موضوع پر بنائی گئی ہے۔ اس فلم کے ہدایت کار یووال ابراہم اور ریچل سور 2024 کی آسکر ایوارڈ یافتہ دستاویزی فلم ’’نو ادر لینڈ‘‘ کے لیے بھی شہرت رکھتے ہیں۔

فیسٹیول کا افتتاح روپرٹ مرڈوک کے برطانوی میڈیا کی دنیا میں عروج پر مبنی فلم ’’انک‘‘ سے ہوا، جس کے ہدایت کار ’’ٹرین اسپاٹنگ‘‘ کے ڈینی بوئل ہیں۔

مقابلے میں مارٹن مک ڈونا کی فلم ’’وائلڈ ہارس نائن‘‘ بھی شامل ہے، جس میں جان مالکووچ اور سیم راک ویل سی آئی اے کے دو غیر معمولی کردار ادا کر رہے ہیں۔ فلوریان زیلر کی نفسیاتی تھرلر فلم ’’بنکر‘‘ میں ہسپانوی اداکار جوڑی پینیلوپ کروز اور ہاویئر باردم ایک ساتھ نظر آئیں گے۔

وینس فلم فیسٹیول میں معروف جرمن ہدایت کار ورنر ہرزوگ کی فلم ’’بکنگ فاسٹارڈ‘‘ اور امریکی ہدایت کار لانس اوپن ہائم کی فلم ’’پرائم ٹائم‘‘ بھی گولڈن لائن ایوارڈ کے لیے مقابلہ کر رہی ہیں۔ ’’پرائم ٹائم‘‘ میں رابرٹ پیٹنسن بھی اداکاری کر رہے ہیں۔

رواں برس وینس فیسٹیول میں ہالی ووڈ کی بڑی فلموں کے پریمیئرز نسبتاً کم ہیں، تاہم اویسس کے لیام اور نول گالاگر کی دوبارہ اکٹھے ہونے کی کہانی پر مبنی دستاویزی فلم ’’ڈونٹ لوک بیک اِن اینگر‘‘ خصوصی توجہ حاصل کر رہی ہے۔

فلم گزشتہ برس اویسس کے کامیاب واپسی دورے اور دونوں بھائیوں کے درمیان طویل عرصے بعد صلح کی عکاسی کرتی ہے۔ فیسٹیول انتظامیہ کے مطابق دونوں بھائی ہفتے کو فلم کے پریمیئر کے موقع پر ریڈ کارپٹ پر بھی جلوہ گر ہوں گے۔

ایلون مسک بھی وینس فیسٹیول میں موضوعِ بحث ہیں۔ امریکی دستاویزی فلم ساز ایلکس گبنی نے مسک کی زندگی اور اثر و رسوخ پر تقریباً چار گھنٹے طویل دستاویزی فلم تیار کی ہے۔

ایلون مسک نے اس فلم کو تنقید کا نشانہ بناتے ہوئے اسے اپنے خلاف بنایا گیا منصوبہ قرار دیا ہے، جبکہ گبنی کے مطابق فلم دنیا کے بااثر کاروباری افراد میں شامل مسک کی زندگی اور کردار کا غیر جانب دارانہ جائزہ پیش کرتی ہے۔

اس سال فیسٹیول میں آرٹ اور جنگ کے موضوعات بھی نمایاں ہیں۔ اسرائیلی افواج کے ہاتھوں غزہ میں شہریوں کی ہلاکتوں کے موضوع پر بنائی گئی دستاویزی فلم ’’نازا‘‘ کے باعث غزہ جنگ بھی فیسٹیول کے اہم موضوعات میں شامل ہوگئی ہے۔

تاہم یہ واضح نہیں کہ رواں برس غزہ کی جنگ فیسٹیول میں گزشتہ سال کی طرح مرکزی موضوع بنے گی یا نہیں۔ 2025 کے وینس فلم فیسٹیول میں فلسطینی بچی ہند رجب کی ہلاکت پر بنائی گئی فلم ’’دی وائس آف ہند رجب‘‘ کو طویل اسٹینڈنگ اوویشن ملی تھی اور فلم نے گرینڈ جیوری کا دوسرا بڑا انعام حاصل کیا تھا۔