عوامی شکایات کا فوری ازالہ اور صارفین کو بہتر بجلی کی فراہمی اولین ترجیح ہے، خرم شہزاد

 لاہور(این ایل آئی)لیسکو کماہاں سرکل کے ایس ڈی او خرم شہزاد نے نیوز لائن انٹرنیشنل(این ایل آئی) کو اپنے ایک خصوصی انٹرویو میں کہا ہے کہ صارفین کو بہتر بجلی کی فراہمی، شکایات کا بروقت ازالہ اور عوام کو ریلیف فراہم کرنا ہماری بنیادی ذمہ داری ہے۔ بجلی کے نظام میں بہتری کے لیے فیلڈ میں موجود عملہ اپنی ذمہ داریاں پوری کرنے کی کوشش کر رہا ہے۔

ایک سوال کے جواب میں خرم شہزاد نے کہا کہ صارفین کی شکایات کو نظرانداز کرنے کے بجائے ان کے فوری حل کو ترجیح دی جاتی ہے۔ بجلی کی خرابی، ٹرپنگ، وولٹیج کے مسائل یا دیگر شکایات موصول ہونے پر متعلقہ عملے کو فوری کارروائی کی ہدایت کی جاتی ہے۔

انہوں نے کہا کہ بجلی کی فراہمی ایک حساس معاملہ ہے اور معمولی خرابی بھی شہریوں کے روزمرہ معمولات کو متاثر کرتی ہے، اس لیے فیلڈ اسٹاف کو ہدایت ہے کہ شکایت موصول ہونے کے بعد ممکنہ حد تک کم وقت میں مسئلہ حل کیا جائے۔

خرم شہزاد کے مطابق بجلی چوری کی روک تھام اور لائن لاسز میں کمی کے لیے بھی متعلقہ ٹیمیں اپنی ذمہ داریاں ادا کر رہی ہیں، تاہم اس حوالے سے صارفین کا تعاون بھی انتہائی اہم ہے۔ انہوں نے عوام سے اپیل کی کہ بجلی کے غیر قانونی استعمال سے گریز کریں اور کسی بھی شکایت کی صورت میں متعلقہ لیسکو دفتر سے رابطہ کریں۔

انہوں نے مزید کہا کہ محکمہ اور صارفین کے درمیان بہتر رابطہ ہی بجلی کے نظام میں بہتری کا ذریعہ بن سکتا ہے۔ افسران اور فیلڈ اسٹاف کو چاہیے کہ وہ دفتر تک محدود رہنے کے بجائے موقع پر جا کر عوامی مسائل کا جائزہ لیں۔

علاقہ مکینوں کی جانب سے بھی ایس ڈی او خرم شہزاد کے رویے اور عوامی شکایات سننے کے انداز کو سراہا گیا ہے۔ شہریوں کا کہنا ہے کہ عوام سے خوش اخلاقی اور مسئلے کو سنجیدگی سے سننا ایک سرکاری افسر کی اچھی کارکردگی کی علامت ہے۔

خرم شہزاد نے کہا کہ عہدہ اور اختیار دراصل عوام کی خدمت کی ذمہ داری ہے اور وہ اپنے دائرہ اختیار میں رہتے ہوئے صارفین کو زیادہ سے زیادہ سہولت فراہم کرنے کے لیے کردار ادا کرتے رہیں گے۔