انگلینڈ سے ٹیسٹ سیریز میں شکست، عاقب جاوید نے کپتان اور کوچ کو ذمہ دار قرار دے دیا

لاہور(خان حسن) پاکستان کرکٹ بورڈ (پی سی بی) کے ڈائریکٹر ہائی پرفارمنس اور قومی کرکٹ ٹیم کی سلیکشن کمیٹی کے رکن عاقب جاوید نے انگلینڈ کے خلاف ٹیسٹ سیریز میں شکست پر کپتان بابر اعظم اور کوچ سرفراز احمد کو ذمہ دار قرار دیتے ہوئے کہا ہے کہ ٹیم کے کمبی نیشن اور پلیئنگ الیون کے حوالے سے مطلوبہ فیصلے نہیں کیے جا رہے تھے۔

عاقب جاوید نے ٹیم میں ہونے والی غیر معمولی تبدیلیوں کا دفاع کیا۔ ان کا کہنا تھا کہ بعض معاملات سلیکٹرز کی ذمہ داری ہوتے ہیں اور وہ اسکواڈ کی ذمہ داری لینے کے لیے تیار ہیں، تاہم دورے کے دوران جس نوعیت کے ٹیم کمبی نیشن کی ضرورت تھی، وہ حاصل نہیں ہو پا رہا تھا۔

عاقب جاوید کے مطابق انہوں نے اس معاملے پر کپتان بابر اعظم اور کوچ سرفراز احمد سے بھی بات کی تھی۔ ان کا کہنا تھا کہ جب کپتان اور کوچ بروقت فیصلے نہیں کر پاتے تو کسی نہ کسی کو ایکشن لینا پڑتا ہے۔

انہوں نے کہا کہ دنیا پاکستان کرکٹ پر اس لیے ہنس رہی ہے کیونکہ ٹیم مقابلہ کرنے کی پوزیشن میں بھی نظر نہیں آ رہی۔ ان کے مطابق حالیہ تبدیلیوں کا مقصد ٹیم کو یہ واضح پیغام دینا ہے کہ پلاننگ کے مطابق پلیئنگ الیون اور ٹیم کمبی نیشن کو بہتر بنایا جائے، کیونکہ کپتان، کوچ اور مینجمنٹ سب کی اپنی اپنی ذمہ داریاں ہوتی ہیں۔

عاقب جاوید نے قومی ٹیم میں قیادت کے بحران کی نشاندہی کرتے ہوئے کہا کہ پوری پاکستان کرکٹ ٹیم میں بہت کم ایسے کھلاڑی موجود ہیں جنہیں ٹیم کی قیادت سونپی جا سکتی ہے۔