نیویارک: ٹائم میگزین نے TIME100 AI 2026 فہرست جاری کردی ہے، جس میں دنیا بھر میں مصنوعی ذہانت کی ترقی اور سمت پر سب سے زیادہ اثرانداز ہونے والے 100 افراد کو شامل کیا گیا ہے۔
یہ فہرست مسلسل چوتھے سال جاری کی گئی ہے، جس میں بڑی ٹیکنالوجی اور اے آئی کمپنیوں کے سربراہان کے ساتھ محققین، کاروباری شخصیات، پالیسی سازوں، مزدور حقوق کے نمائندوں اور تخلیقی شعبے سے وابستہ افراد کو بھی جگہ دی گئی ہے۔
ٹائم نے فہرست میں شامل شخصیات کو چار کیٹیگریز: Leaders، Innovators، Shapers اور Thinkers میں تقسیم کیا ہے۔
ٹیکنالوجی کے بڑے نام
Leaders کیٹیگری میں اوپن اے آئی کے چیف ریسرچ آفیسر مارک چن، چیف ایگزیکٹو آفیسر سیم آلٹ مین اور صدر گریگ بروک مین، اسپیس ایکس کے سربراہ ایلون مسک، اینتھروپک کے شریک بانیوں ڈاریو اور ڈینیئلا اموڈی، آئی بی ایم کے چیئرمین و سی ای او اروِند کرشنا، گوگل ڈیپ مائنڈ کی چیف اے آئی ریڈی نس آفیسر لیلا ابراہیم اور بائٹ ڈانس کے چیئرمین و سی ای او لیانگ روبو شامل ہیں۔
اے آئی کے لیے درکار انفراسٹرکچر تیار کرنے والی کمپنیوں کی اہم شخصیات کو بھی اس فہرست میں شامل کیا گیا ہے، جن میں براڈ کام کے سی ای او ہاک ٹین، اوریکل کے ایگزیکٹو چیئرمین و سی ٹی او لیری ایلیسن، کور ویو کے شریک بانی و سی ای او مائیکل انٹراٹر اور ایس ایم آئی سی کے شریک سی ای او لیانگ مونگ سونگ شامل ہیں۔
اے آئی کے نئے استعمال اور تخلیقی شعبہ
Innovators کیٹیگری میں اے آئی کے نئے استعمال اور ٹیکنالوجی کے مختلف شعبوں میں جدت لانے والی شخصیات کو شامل کیا گیا ہے۔ ان میں OpenEvidence کے بانی ڈینیئل نڈلر، Cursor کے سی ای او مائیکل ٹروئل، Moonshot AI کے سی ای او یانگ ژیلن، کیل ٹیک کی پروفیسر انیما آنند کمار اور Cerebras Systems کے شریک بانی و سی ای او اینڈریو فیلڈمین شامل ہیں۔
ٹائم نے اے آئی کے بڑھتے ہوئے تخلیقی اثرات کو بھی اجاگر کرتے ہوئے اداکار اور فلم ساز بین ایفلک کو Innovators میں شامل کیا ہے۔ اسی کیٹیگری میں Suno کے شریک بانی و سی ای او مائیکی شولمین اور Tarteel کے شریک بانی و سی ٹی او محمد موسیٰ بھی شامل ہیں۔
اے آئی پالیسی اور فنکاروں کے حقوق
Shapers کیٹیگری میں انٹرنیشنل ٹیلی کمیونیکیشن یونین کی سیکریٹری جنرل ڈورین بوگڈان مارٹن شامل ہیں، جن کی توجہ ڈیجیٹل خلیج کم کرنے اور دنیا بھر میں اے آئی کی ترقی میں زیادہ سے زیادہ شمولیت پر مرکوز رہی ہے۔
اداکار اور فلم ساز جوزف گورڈن لیوِٹ کو بھی Shaper قرار دیا گیا ہے۔ وہ Creators Coalition on AI کے شریک بانی ہیں اور اے آئی سے متعلق فیصلوں میں فنکاروں اور عوام کی زیادہ شمولیت اور تخلیق کاروں کے حقوق کے تحفظ کے حامی رہے ہیں۔
چینی اے آئی ماہرین کی نمایاں موجودگی
ٹائم کے ایڈیٹر اِن چیف سیم جیکبز کے مطابق رواں سال کی فہرست ایسے وقت میں سامنے آئی ہے جب اے آئی کی دنیا مزید تیزی سے تبدیل ہونے کے ساتھ ساتھ زیادہ متنازع اور تقسیم شدہ بھی ہو رہی ہے۔
فہرست میں چینی ٹیکنالوجی اور اے آئی صنعت کی نمایاں شخصیات کی موجودگی بھی قابلِ ذکر ہے۔ ان میں بائٹ ڈانس کے لیانگ روبو، علی بابا کے سی ای او ایڈی وو، Moonshot AI کے یانگ ژیلن، Zhipu کے سی ای او ژانگ پینگ، AgiBot کے سی ای او ڈینگ تائیہوا اور ایس ایم آئی سی کے ایگزیکٹو لیانگ مونگ سونگ شامل ہیں۔
ٹائم کے مطابق یہ فہرست اس بات کی عکاسی کرتی ہے کہ مصنوعی ذہانت اب صرف ٹیکنالوجی کا شعبہ نہیں رہی بلکہ عالمی معیشت، سیاست، انفراسٹرکچر، تخلیقی صنعت اور مستقبل کی پالیسی سازی پر بھی گہرا اثر ڈال رہی ہے۔