بھارتی ریپر بادشاہ اور اداکارہ ایشا رِکھی کی شادی 5 ماہ بعد ختم، علیحدگی کی تصدیق

بھارتی ریپر بادشاہ اور پنجابی اداکارہ ایشا رِکھی نے شادی کے صرف پانچ ماہ بعد علیحدگی کی تصدیق کردی۔

دونوں نے پیر کے روز اپنے اپنے انسٹاگرام اسٹوریز پر ایک جیسا بیان جاری کرتے ہوئے بتایا کہ انہوں نے باہمی رضامندی سے اپنی راہیں جدا کرنے کا فیصلہ کیا ہے۔

بادشاہ نے اپنے بیان میں لکھا، ’’میں اور ایشا رِکھی نے باہمی رضامندی سے علیحدگی اختیار کرنے اور اپنی اپنی زندگی میں آگے بڑھنے کا فیصلہ کیا ہے۔‘‘

انہوں نے کہا کہ یہ فیصلہ باہمی احترام کے ساتھ کیا گیا ہے اور مداحوں و میڈیا سے درخواست کی کہ اس مشکل وقت میں انہیں ذاتی زندگی کے لیے کچھ جگہ دی جائے۔

بادشاہ نے واضح کیا کہ یہی اس معاملے پر ان دونوں کا واحد بیان ہوگا اور وہ اپنی علیحدگی سے متعلق مزید قیاس آرائیاں نہیں چاہتے۔

کچھ ہی دیر بعد ایشا رِکھی نے بھی اپنے انسٹاگرام اکاؤنٹ پر بالکل یہی بیان شیئر کرتے ہوئے تصدیق کی کہ دونوں نے باہمی رضامندی سے اپنی راہیں جدا کرنے کا فیصلہ کیا ہے اور نجی زندگی کے احترام کی درخواست کی۔

دونوں کے درمیان اختلافات کی قیاس آرائیاں پیر کے اعلان سے کئی ہفتے قبل ہی گردش کر رہی تھیں۔

ایشا رِکھی نے ایک انسٹاگرام پوسٹ میں بھی مبینہ طور پر اپنی صورتحال کی جانب اشارہ کیا تھا، تاہم بعد میں یہ پوسٹ ڈیلیٹ کردی گئی۔

اپنی پوسٹ میں اداکارہ نے لکھا تھا کہ وہ قبول کرنے کی وجہ سے نہیں بلکہ خوف کے باعث خاموش رہی تھیں۔ ان کے مطابق وہ اپنے شوہر کے اثر و رسوخ اور وسائل سے خود کو ’’مغلوب‘‘ محسوس کرتی رہی تھیں اور انہیں لگتا تھا کہ خاموش رہنا ہی زیادہ محفوظ راستہ ہے۔

ایشا نے مزید کہا تھا کہ اب وہ خوف کے بجائے ہمت کا انتخاب کر رہی ہیں، تاہم وہ اس معاملے کی مزید تفصیلات بتانے کے لیے تیار نہیں۔

بادشاہ اور ایشا رِکھی کی شادی کی خبریں رواں برس مارچ میں اس وقت سامنے آئی تھیں جب ایشا کی والدہ پونم رِکھی نے شادی کی تقریبات سے بظاہر لی گئی تصاویر سوشل میڈیا پر شیئر کیں۔

تصاویر کے ساتھ انہوں نے مختصر پیغام ’’خدا آپ دونوں کو خوش رکھے‘‘ تحریر کیا تھا۔ تصاویر میں بادشاہ کو بھورے رنگ کے کُرتے اور سنہری صافے جبکہ ایشا کو سرخ شلوار قمیض میں دیکھا گیا تھا۔

ایک تصویر میں دونوں کو مبینہ طور پر ورمالا کی رسم کے دوران ایک دوسرے کو ہار پہناتے ہوئے بھی دیکھا گیا۔

بعد ازاں پونم رِکھی نے شادی کی رسومات کی ایک ویڈیو بھی شیئر کی، جس کے بعد دونوں کی شادی سے متعلق قیاس آرائیاں مزید بڑھ گئیں۔

بادشاہ اور ایشا کے بارے میں بتایا جاتا تھا کہ وہ تقریباً چار برس سے ایک دوسرے کو ڈیٹ کر رہے تھے۔ دونوں کی ملاقات مشترکہ دوستوں کے ذریعے ہوئی تھی اور انہوں نے اپنے تعلق کو زیادہ تر نجی رکھا۔

پونم رِکھی کی پوسٹ کے ایک ماہ بعد بادشاہ نے بھی اپنی شادی کی تصاویر شیئر کیں، تاہم انہوں نے ایشا کا چہرہ واضح طور پر دکھانے سے گریز کیا۔

بعد ازاں دونوں نے اپریل میں روایتی گوردوارہ تقریب میں شادی کی، جس کے بارے میں کہا گیا تھا کہ دونوں خاندان اس رشتے پر رضامند تھے۔

ایشا رِکھی سے علیحدگی بادشاہ کی دوسری شادی کے اختتام کی نشاندہی کرتی ہے۔

اس سے قبل بادشاہ نے جاسمین مسیح سے شادی کی تھی، جن سے ان کی ملاقات آن لائن ہوئی تھی۔ دونوں نے 2012 میں شادی کی جبکہ 2017 میں ان کے ہاں بیٹی جیسمی گریس مسیح سنگھ کی پیدائش ہوئی۔

دونوں 2020 میں علیحدہ ہوگئے تھے، جبکہ جاسمین اس وقت اپنی بیٹی کے ہمراہ لندن میں مقیم ہیں۔

دوسری جانب ایشا رِکھی نے پنجابی فلم ’جٹ بوائز پُت جٹاں دے‘ سے اداکاری کا آغاز کیا اور بعد ازاں فلم ’نوازبڑے‘ کے ذریعے بالی ووڈ میں قدم رکھا۔